BERE ALBOAN
BERE ALBOAN
Ikusi nuen lehen
unetik jakin nuen bera zela, bizitza osoa pasako nuela bere alboan.
Egunero ordu berean
esnatzen gara, fereka batzuk ohean eta nik mantatik tira egiten dut goizeko
hotzak bere azal leuna jotzen utziz. Logelako atea zabaltzen dut eta atzetik
etortzen zait, gosaltzeko ordua da eta berak katilua eusten duen bitartean nik
esnea bertan erortzen uzten dut. Ohitura bihurtu da goizetan kafea hartzea.
Neguko lehen izpiak
ageri dira zeruan eta haizeak belarrietan hitz samurrak xuxurlatzen ditu hauek
gorriaraziz. Zu, hotzaren preso, berokiaren atzean ezkutatzen zara, nik aterkia
eusten dudan bitartean.
Larunbata da gaur,
eta gure loradenda zabaldu behar dugu. Herri txikia den arren, jende askok
erosten ditu loreak. Zuk lore sorta barruan sartuko ditugun zorion txartelak
idazten dituzun bitartean, soilik zure begira egon naiteke ni. Hain polita
zaude paper gainean bueltaka, dantzari fin horietako bat bezala, biraka. Tinta
apur batez zikindu zara eta nik aukera aprobetxatuz zure azal goxoa laztantzen
dut, kolore beltza zure zimur txikien artean desagerraraziz.
Malen da eguneko
lehen bezeroa, goizero legez, arrosa batzuk nahi
ditu bere kafetegiko mahaietan jartzeko. Zuk handienak aukeratzen dituzu eta
nik mozten ditut, zuk mahaian ipini eta nik papera moztu, zuk lore sorta
paperean bildu eta nik zinta urdin batez inguratzen ditut, bion artean begizta
panpox bat eginez. Bukatzeko zure txartel horietako bat sartzen dugu barruan
Malenen eguna apur bat alaitzeko. Ondoren, dirua jasotzen duzu eta nik
arin-arin agurtu egiten dut.
Horrelakoak izaten
dira gure egun guztiak. Jazz musika jartzen dugu dendan eta inork ikusten ez
gaituenean, dantza egiten dugu; gauean ikusten ditugun pelikuletan egiten duten
antzera. Gaur liburu bat ekarri duzu, poema liburu bat, ni adi-adi zure alboan
jarri naiz. Arreta handiz begiratu ditut gaur zure hatzak, luze eta finak,
eraztun bat daramazu beti eta nik gorriz margotu nizkizun azkazal amaigabeak.
Laztandu egiten duzu ikuskatzen duzun orrialde bakoitzean ageri den lerro
bakoitza, ukimenaren bidez metafora guztiak barneratuko bazenitu bezala.
Horrela egongo nintzake bizitza osoa, zu poesia artean murgilduta ikusiz.
Gauak egunari
aurrea hartzen dio eta denda agurtzen dugu. Nik atea isten dut, zuk giltza
jiratu. Euria baretu da eta biak ezkutaketan jolas egiten dugu orduan, berokiaren atzean. Jokin ikusten dugu eta nik atzamar puntekin agurtzen dut
mugimendu azkar batez zurekin jolasean jarraitzeko. Itxi-idiki batean etxera
iritsi gara. Zein sotila den bide luze bat zure alboan.
Haragia prestatuko
dugu afaltzeko, nik atera eta zuk moztuko duzu. Zein ondo moldatzen garen biok
bakarrik. Une batez ez zaitut begiratzen, pentsatzen geratu naiz, a ze zortea
nirea zu beti hain gertu edukitzea, hotza dudanean zu besarkatzea, grabitateari
burla eginez aire artean elkarrekin mugitzea. Artista, idazle, maitale bihurtu
gara.
Momentu horretan
sentitzen dut, zerbaitek bustitzen nau. Zu begiratu zaitut eta ondoren mahaia.
Labana lurrean. Nire azala gorriz margotzen ari den mihise bat dirudi, action painting teknika erabiliz
marraztu den koadro abangoardista horietako bat. Laster zapi batez estaltzen
nauzu eta une horretan ikusten zaitudan azken
aldia da, badakit. Amaiezin bezala gogoratuko dudan unea. Dardarka hasten naiz,
hotz naiz, maitea, besarka nauzazu. Non zaude? Urrun sentitzen zaitut. Etxe
barruan gaude baina euria ari du. Tanta bat, bi, hiru, zaparrada. Har ezazu
aterkia, maitea. Berriro ezkutatu zara berokiaren atzean? Ahul sentitzen naiz,
ez zaitut ikusten, dena ilun dago eta ez nago zure ondoan gauero bezala, maindire artean.
Iluntasuna, hotza,
dardara, hutsa.
Egunero ordu berean
esnatzen naiz. Katilua hartu eta esnea barruan erortzea lorpen bat iruditzen
zait. Jada ezin dut kafea edan. Hotzak hezurrak arpilatzen dizkit eta ezin
naiz berokiaren atzean ezkutatu, nik neuk eraman behar dut aterkia. Dendara
iristen naiz, egunero legez, baina ez daukat zorion txartelak idazteko gogorik.
Jazz musika jartzeaz ahaztu naiz eta ezin dut poesia liburua zabaldu. Tinta
potoa jo dut nahi gabe eta mahai osotik zabaldu
da. Malen azaldu da orduan, arrosen bila dator. Berak egin du zuk egiten zenuena,
nire zimurretatik kolore beltza kendu. Jarraian, azken egunetan mila aldiz entzundakoa entzun nuen berriro ere: “Lasai, normala da, ohituko zara”.
Ez dakite zertaz
ari diren, beraiek ez dute ezkerreko eskua galdu.
Comentarios
Publicar un comentario